កីឡា៖ ប្រធានាធិបតីបារាំង លោក អេម៉ាញូអែល ម៉ាក្រុង (Emmanuel Macron) ថ្លែងថា លោកសង្ឃឹមថាកំពូលកីឡាករ Kylian Mbappe នឹងមានវត្តមានជាមួយក្រុមបាល់ទាត់ជម្រើសជាតិបារាំងក្នុងព្រឹត្តិការណ៍កីឡាអូឡាំពិក ឆ្នាំ២០២៤នេះ ដែលធ្វើឡើងនៅក្នុងទីក្រុងប៉ារីស។ 

គួរបញ្ជាក់ថា កីឡាករជម្រើសជាតិបារាំង Kylian Mbappe ទើបនឹងបានប្រកាសកាលពីថ្ងៃសុក្រថារូបគេនឹងចាកចេញពី Paris St Germain ដែលតាមប្រភពជាច្រើនបានអះអាងថា កីឡាកររូបនេះទំនងជានឹងចូលរួមជាមួយក្រុម Real Madrid នៅទឹកដីអេស្ប៉ាញ។ 

តាមរយៈវីដេអូមួយនៅលើបណ្ដាញសង្គម X លោក Macron  ថ្លែងថា៖ "ខ្ញុំមិនមានអ្វីបរិយាយច្រើនឡើយក្រៅតែពីការរំពឹងថា Real Madrid នឹងអនុញ្ញាតឱ្យ Kylian Mbappe អាចបង្ហាញខ្លួនជាមួយក្រុមបាល់ទាត់ជម្រើសជាតិបារាំងនៅក្នុងព្រឹត្តិការណ៍កីឡាអូឡាំពិក ឆ្នាំ២០២៤"។ 

គួរបញ្ជាក់ថា Kylian Mbappe បច្ចុប្បន្នមានវ័យ ២៥ឆ្នាំ និងធ្លាប់បានបង្ហាញខ្លួន ៧៧ប្រកួតជាមួយក្រុមជម្រើសជាតិបារាំង និងរួមចំណែកក្នុងការជួយឱ្យបារាំងគ្រងជើងឯកបាល់ទាត់ពិភពលោក FIFA World Cup ម្តងកាលពីឆ្នាំ២០១៨ នៅលើទឹកដីរុស្សី៕